सचिन माथेफोड,पुणे
मांजरी खुर्द (ता. हवेली) येथे थेऊर येथील सामाजिक कार्यकर्त्या सौ. पल्लवीताई युवराज काकडे यांच्या वतीने आयोजित करण्यात आलेल्या, मोफत सर्वरोग निदान महाआरोग्य शिबिरास स्थानिक नागरिकांचा मोठ्या प्रमाणात उत्स्फूर्त प्रतिसाद लाभला. शिबिरामध्ये तब्बल ११४५ हून अधिक नागरिकांनी सहभाग नोंदविला.
शिबिरादरम्यान ७२० नागरिकांची डोळ्यांची तपासणी करण्यात आली असून त्यापैकी ६४० नागरिकांना मोफत चष्म्यांचे वाटप करण्यात आले. तसेच ५१ रुग्णांमध्ये मोतीबिंदू, ७ रुग्णांना कान व नाकाचे ऑपरेशन, तर १ रुग्णाला गुडघ्याच्या शस्त्रक्रियेचे निदान झाले असून, या सर्वांवर आगामी काही दिवसांत मोफत शस्त्रक्रिया करण्यात येणार आहेत. याशिवाय ४ नागरिकांना कृत्रिम हात व पाय देण्यात येणार असल्याची माहिती आरोग्यदूत युवराज काकडे यांनी दिली.
या शिबिरात हृदय तपासणी, सर्वसाधारण आरोग्य तपासणी, दंत तपासणी, हाडांची घनता तपासणी, स्त्रीरोग तपासणी, ईसीजी, हिमोग्लोबिन, शुगर, रक्तदाब तसेच कान-नाक-घसा तपासणी अशा विविध सेवांचा समावेश होता. याचबरोबर हात व पायांच्या मोफत कृत्रिम अवयवांसाठी नोंदणी देखील करण्यात आली.
या महाआरोग्य शिबिरामुळे परिसरातील अनेक नागरिकांना महत्त्वाच्या तपासण्या, निदान व उपचार विनामूल्य उपलब्ध झाले असून, या उपक्रमाचे नागरिकांकडून कौतुक करण्यात येत आहे. अशा महाआरोग्य शिबिरांची शेजारील इतर गावांमध्येही मागणी होताना दिसते आहे.
