उरुळी कांचन प्रतिनिधी
उरुळी कांचन (ता. हवेली) —
“इथून पुढे मराठीमध्ये माहिती असावी, नाहीतर मनसे स्टाईल आंदोलन करण्यात येईल!” असा इशारा महाराष्ट्र नवनिर्माण सेनेचे हवेली तालुका उपाध्यक्ष अनिरुद्ध मराठे यांनी बँक ऑफ महाराष्ट्रच्या अधिकाऱ्यांना दिला आहे.
सदर बँकेत एटीएम किंवा प्रिंट मशीनवर माहिती फक्त हिंदी भाषेत दाखवली जात असल्यामुळे नागरिकांना, विशेषतः वृद्ध व्यक्तींना, मोठा त्रास सहन करावा लागत आहे.
मराठे यांनी सांगितले की, “गेल्या महिन्यातच बँक मॅनेजर यांना मशीनवरील सूचना मराठी भाषेत ठळक अक्षरांत लिहाव्यात अशी विनंती केली होती. परंतु आजतागायत त्याची दखल घेतली गेलेली नाही. आज अनेक नागरिकांनी सांगितले की मशीनमध्ये प्रिंट होत नाही आणि माहिती हिंदीमध्ये असल्यामुळे समजण्यास अडचण येते. वृद्ध महिलांना वाचताही येत नाही — हे अत्यंत दुर्दैवी आहे.”
सामान्य नागरिकांना सातत्याने त्रास होत असल्याने मराठे यांनी बँक व्यवस्थापनास तातडीने मराठी भाषेचा वापर सुरू करण्याचे आवाहन केले असून, अन्यथा मनसेच्या पद्धतीने आंदोलन करण्यात येईल, असा इशाराही दिला आहे.
स्थानिक नागरिकांनीही बँक प्रशासनाने मराठी भाषेचा सन्मान राखावा, अशी मागणी केली आहे.
