सचिन माथेफोड,पुणे
– आजपासून राज्यभरातील शाळा सुरू झाल्या असून कुंजीरवाडी येथील जिल्हा परिषद मराठी शाळेत पहिल्याच दिवशी खास स्वागत समारंभाचे आयोजन करण्यात आले. विद्यार्थ्यांना चॉकलेट, गणवेश, बूट व फुल देऊन प्रेमळ स्वागत करण्यात आले. आपली शाळा, मराठी शाळा असा बुलंद नारा देत शाळेच्या नव्या शैक्षणिक वर्षाची सुरुवात जल्लोषात झाली. कार्यक्रमाच्या अध्यक्षस्थानी शिवसेना नेते स्वप्नील कुंजीर होते. यावेळी शालेय शिक्षण समिती अध्यक्ष नाना कुंजीर, ज्येष्ठ नागरिक संघाचे सचिव बबन कुंजीर, मुख्याध्यापक गोरक्षनाथ ओगले, भाऊ जाधव, राहुल हेंद्रे, ठकुबाई कुंजीर, प्रकाश चौधरी, बाप्पू डाके यांच्यासह मान्यवर, पालकवर्ग व ग्रामस्थ मोठ्या संख्येने उपस्थित होते. यावेळी बोलताना स्वप्नील कुंजीर म्हणाले, आज पालक आपल्या मुलांना इंग्लिश मीडियम शाळांमध्ये प्रवेश देताना मोठ्या प्रमाणावर आर्थिक खर्च करतात. मात्र जिल्हा परिषद शाळांमधूनही उत्तम दर्जाचे शिक्षण मिळू शकते. मराठी शाळा हीच खरी गुणवत्ता आणि संस्कारांची शाळा आहे. शाळेतील वातावरण आनंददायी होते. मुलांच्या चेहऱ्यावर हसू फुलले होते. गावातील पालकांनीही या उपक्रमाचे कौतुक करत जिल्हा परिषद शाळेतील बदलते चित्र स्वागतार्ह असल्याचे सांगितले.
