प्रा. एस एम सर
हवेली तालुक्यात मागील महिन्यात झालेल्या मुसळधार पावसाने हाहाकार माजवला होता. या पावसात अनेक गोरगरीब कुटुंबांचे संसार उद्ध्वस्त झाले, घरात पाणी शिरून मोठ्या प्रमाणात नुकसान झाले. विशेषतः थेऊर येथील रुके वस्ती भागात ढगफुटी सदृश्य पावसामुळे नागरिकांच्या घरांमध्ये पुराचे पाणी घुसले आणि नैसर्गिक आपत्तीचा फटका बसला.
या आपत्तीग्रस्त नागरिकांच्या मदतीसाठी लोणी काळभोर पोलिसांनी सामाजिक बांधिलकी जपत पुढाकार घेतला. दिवाळीच्या पार्श्वभूमीवर त्यांनी आपापसात वर्गणी गोळा करून रुके वस्तीतील तब्बल 28 कुटुंबांना शिधावाटप, दिवाळी साहित्य आणि मिठाईचे वाटप केले.
दिनांक 18 ऑक्टोबर 2025 रोजी लोणी काळभोर पोलीस ठाण्यात झालेल्या या कार्यक्रमात वरिष्ठ पोलीस निरीक्षक राजेंद्र पन्हाळे यांच्या हस्ते शिधा वाटप करण्यात आले. या उपक्रमात पोलीस निरीक्षक (गुन्हे) सौ. स्मिता पाटील यांच्या मार्गदर्शनाखाली सर्व पोलीस अधिकारी आणि कर्मचारी यांनी सक्रिय सहभाग घेतला.
आपत्तीग्रस्त कुटुंबांना दीपावलीच्या सणाआधी मिळालेली ही मदत म्हणजे खऱ्या अर्थाने आनंदाचा किरण ठरली. “पोलिस म्हणजे केवळ कायदा राखणारे नव्हेत, तर समाजाशी नाळ जोडणारे आधारवड आहेत,” अशी भावना नागरिकांनी व्यक्त केली. परिसरात पोलिसांच्या या सामाजिक संवेदनशीलतेची सर्वत्र प्रशंसा होत आहे.
