“एक गाव, एक गणपती” संकल्पनेला ग्रामस्थांनी उत्स्फूर्त प्रतिसाद देऊन – सामाजिक ऐक्याचा नवा आदर्श निर्माण कराव
सचिन माथेफोड,पुणे
दि. २७ जुलै २०२५ – आगामी गणेशोत्सवाच्या पार्श्वभूमीवर गावात “एक गाव, एक गणपती” या उपक्रमासाठी ग्रामस्थांना आवाहन करण्यात आले असून, या अभिनव संकल्पनेला गावकऱ्यांनी उत्स्फूर्त प्रतिसाद द्यावा,तसेच जमलेल्या रकमेमधून गावातील सामाजिक विकासास हातभार लावावा.
सण-उत्सवांमध्ये होणाऱ्या स्पर्धात्मकतेला दूर ठेवून सामाजिक एकोपा, पर्यावरण संवर्धन आणि खर्चिक आयोजनांना आळा बसावा या हेतूने या संकल्पनेचा प्रस्ताव मांडण्यात आला आहे. गावातील सर्व गणेश मंडळे, युवक, महिला मंडळे आणि ग्रामपंचायत यांच्यात समन्वयाने एकच सार्वजनिक गणेशोत्सव साजरा करण्याचे नियोजन केले जात आहे.
दत्तात्रय जवळकर व वाल्मीक जवळकर म्हणाले, “या उपक्रमामुळे गावात एकोप्याचे वातावरण निर्माण होईल, अनावश्यक खर्च वाचेल आणि पर्यावरण पूरक गणेशोत्सव साजरा करता येईल. गावकरी एकत्र येऊन एकाच ठिकाणी श्री गणेशाची स्थापना करतील.”
या निर्णयामुळे आवाजाची प्रदूषण, विजेचा अपव्यय, तसेच मूर्ती विसर्जनामुळे होणारे जलप्रदूषण टळणार आहे. पर्यावरणपूरक मूर्ती, पारंपरिक संस्कृतीचे जतन, आणि एकत्रित सांस्कृतिक कार्यक्रमांच्या आयोजनामुळे नव्या पिढीला सकारात्मक संदेश दिला जाणार आहे.यावेळी भगवान जवळकर,मोहन जवळकर,माऊली जवळकर,शंकर जवळकर उपस्थित होते.
