बारामती, दि. २१ (प्रतिनिधी) –
जिल्हा परिषद प्राथमिक शाळा होळकरवस्ती, कारखेल येथे आज सकाळी ८ वाजता आंतरराष्ट्रीय योग दिनानिमित्त विविध उपक्रमांचे आयोजन करण्यात आले. ग्रामीण कृषि कार्यानुभव कार्यक्रम अंतर्गत डॉ. शरदचंद्र पवार कृषी महाविद्यालय, बारामती येथील कृषिकन्या ज्ञानेश्वरी गायकवाड, सानिका गवळी, सृष्टी गावडे, प्रतीक्षा जंजीरे, प्रगती कदम, स्वस्तिका पाटील व गायत्री चव्हाण यांनी याचे आयोजन केले.
कार्यक्रमात विद्यार्थ्यांनी मोठ्या उत्साहाने सहभाग घेत योगासने सादर केली. मुलांनी उत्स्फूर्तपणे विविध प्रकारची योगासने करून योग दिनाचे महत्त्व अधोरेखित केले. योगाभ्यासानंतर शाळेच्या शिक्षक व विद्यार्थ्यांच्या हस्ते वृक्षारोपण करून पर्यावरण संवर्धनाचा संदेश देण्यात आला.
कार्यक्रमाच्या अखेरीस काही विद्यार्थ्यांनी त्यांचे मनोगत व्यक्त केले. शिक्षिका जाधव मॅडम यांनी उपस्थितांचे आभार मानून कार्यक्रमाची सांगता केली.
या वेळी सुभेदार सर, जाधव मॅडम आणि निशा मॅडम यांची प्रमुख उपस्थिती होती.या उपक्रमामुळे विद्यार्थ्यांमध्ये आरोग्याविषयी जागरूकता निर्माण झाली असून शाळा व कृषिकन्यांच्या संयुक्त प्रयत्नांनी एक सकारात्मक सामाजिक संदेश देण्यात आला.
