प्रा एस एम सर,
पुणे (प्रतिनिधी): सत्यशोधक लहुजी वस्ताद साळवे यांच्या 231 व्या जयंती महोत्सवानिमित्त लहुजी फाउंडेशन महाराष्ट्र राज्यतर्फे, आरोग्य क्षेत्रात आणि सामाजिक कार्यात सातत्याने उल्लेखनीय योगदान दिल्याबद्दल युवराज काकडे यांना ‘आरोग्यरत्न सन्मान’ जाहीर करण्यात आला आहे.
युवराज काकडे हे गेल्या अनेक वर्षांपासून हवेली तालुक्यासह पुणे जिल्ह्यातील ग्रामीण भागात आरोग्य सेवा उपलब्ध करून देण्यासाठी कार्यरत आहेत. आर्थिक अडचणीत असलेल्या रुग्णांना हॉस्पिटल बिलात सवलत मिळवून देणे, मुख्यमंत्री सहायता निधी तसेच आरोग्य विभागाच्या माध्यमातून मदत मिळवून देणे, हे त्यांचे कार्य अत्यंत कौतुकास्पद आहे.
थेऊर परिसरात त्यांनी आरोग्य शिबिरे, रक्तदान शिबिरे, आणि स्वच्छता मोहिमा राबवून समाजात जनजागृती निर्माण केली आहे. त्याचबरोबर धार्मिक स्थळांच्या विकासासाठी शासनाकडून निधी मिळवून देत स्थानिक विकासातही मोलाचे योगदान त्यांनी दिले आहे.
फाउंडेशनच्या पदाधिकाऱ्यांनी आज सकाळी युवराज काकडे यांची भेट घेऊन त्यांना जयंती महोत्सवासाठी औपचारिक निमंत्रण दिले.
या सन्मानाबद्दल युवराज काकडे यांनी लहुजी फाउंडेशनचे आभार मानत सांगितले की, हा सन्मान माझ्या नव्हे तर माझ्या कार्यावर विश्वास ठेवणाऱ्या सर्व ग्रामस्थांचा आहे. समाजासाठी अधिक जबाबदारीने काम करण्याची प्रेरणा या पुरस्कारातून मिळाली आहे.”
स्थानिक स्तरावर काकडे यांच्या कार्याचा गौरव होत असून, त्यांचे हे सामाजिक योगदान इतरांसाठी प्रेरणादायी ठरत असल्याची भावना नागरिकांमध्ये व्यक्त होत आहे.
