थेऊर फाटा येथे केबल अंथरण्याच्या कामासाठी करण्यात आलेल्या खड्ड्यांमुळे रहदारीस मोठा अडथळा निर्माण झाला असून वाहनचालकांना प्रचंड त्रास सहन करावा लागत आहे. रस्त्यावर असलेले उघडे व अर्धवट बुजवलेले खड्डे अपघातास आमंत्रण देत असून नागरिकांमध्ये तीव्र संताप व्यक्त होत आहे.
विशेष म्हणजे दरवर्षी १ जानेवारी रोजी विजय स्तंभाला अभिवादन करण्यासाठी या मार्गावरून हजारो अनुयायी प्रवास करतात. अशा वेळी या ठिकाणी असलेले खड्डे मोठ्या दुर्घटनेचे कारण ठरू शकतात, अशी भीती नागरिक व्यक्त करत आहेत.
याबाबत प्रतिक्रिया देताना अण्णासाहेब बोडके, हवेली तालुका उपाध्यक्ष (राष्ट्रवादी काँग्रेस) यांनी सांगितले की, “येथे केबल टाकण्यासाठी खड्डे खोदण्यात आले होते; मात्र संबंधित कंत्राटदाराकडून कोणतीही तपासणी किंवा पूर्णत्वाची जबाबदारी न घेता काम अर्धवट सोडण्यात आले आहे. खोदलेले खड्डे तसेच उघडे असल्याने अपघाताचा धोका वाढला आहे. प्रशासनाने त्वरित दखल घेऊन हे खड्डे बुजवावेत व रस्ता पूर्ववत करावा.”
स्थानिक नागरिकांनीही प्रशासनाकडे तातडीने उपाययोजना करण्याची मागणी केली असून, संभाव्य अपघात टाळण्यासाठी त्वरित काम पूर्ण करून सुरक्षितता सुनिश्चित करण्याची अपेक्षा व्यक्त केली आहे.
