सुभाष कड, सोरतापवाडी
सोरतापवाडी येथील ओरिजनल मातोश्री स्कूलमध्ये वार्षिक क्रीडा दिन मोठ्या उत्साहात आणि आनंदी वातावरणात साजरा करण्यात आला. कार्यक्रमाच्या प्रमुख पाहुण्या म्हणून नृत्याविष्कार अकॅडमीच्या अश्लेषा चोरघे या उपस्थित होत्या.
कार्यक्रमाची सुरुवात सरस्वती पूजन तसेच क्रीडा साहित्याच्या पूजनाने करण्यात आली. त्यानंतर विद्यार्थ्यांनी सुरेल प्रार्थना व राष्ट्रप्रतिज्ञा सादर करून कार्यक्रमाला सुसंस्कृत स्वरूप दिले. विद्यार्थ्यांनी शिस्तबद्ध मार्चपास्ट सादर केला तसेच मशाल फेरीने संपूर्ण मैदानात उत्साहाचे वातावरण निर्माण झाले.
यानंतर विविध क्रीडा स्पर्धांचे आयोजन करण्यात आले. या स्पर्धांमध्ये विद्यार्थ्यांनी उत्स्फूर्त सहभाग घेत आपली क्रीडा कौशल्ये दाखवली. धावणे, उड्या, समन्वय व कौशल्याधारित खेळांमुळे मैदान आनंद, उत्साह आणि टाळ्यांच्या गजराने दुमदुमून गेले.
या प्रसंगी संस्थेचे चेअरमन अविनाश मेमाणे व रूपाली मेमाणे यांची विशेष उपस्थिती होती. त्यांनी विद्यार्थ्यांचे कौतुक करत क्रीडा दिनाचे महत्त्व सांगितले व विद्यार्थ्यांना सर्वांगीण विकासासाठी क्रीडा व शिक्षण यांचा समतोल राखण्याचा संदेश दिला.
एकूणच ओरिजनल मातोश्री स्कूलचा वार्षिक क्रीडा दिन हा विद्यार्थ्यांसाठी अविस्मरणीय ठरला.
